అభివృద్ధి ఎవరికోసం?(కవిత) (రైతన్న వేదన) ప్రాణం కంటే మిన్నగా ప్రేమించిన పచ్చని పొలం.. నేడు కాంక్రీటు అడవికి బలైపోతుంటే, గుండె చెరువై కన్నీరు మున్నీరవుతోంది! చెమట చుక్కలతో తడిపిన మట్టిలో.. నేడు జెండాలు పాతి, సరిహద్దులు గీస్తుంటే నా పేగు తెంచుకుని పోతున్నట్లుంది! రాజధాని అంటారు.. విమానాశ్రయం అంటారు.. ఎత్తైన భవనాలు, ధగధగలాడే మాల్స్ అంటారు.. కానీ, బుక్కెడు మెతుకు పెట్టే నా పొలం లేకపోతే ఈ హంగులు, ఆర్భాటాలు ఎవరి ఆకలి తీరుస్తాయి? డేటా సెంటర్ల వెలుగులు.. నా కంటి నిప్పును ఆర్పగలవా? విమానాల హోరు.. నా గుండె కోతను వినిపించనివ్వదా? మాగాణిని మింగేసి మహానగరాలు కడతారా? రక్తపు చుక్కలను తుడిచేసి రంగుల లోకం చూపుతారా? తాత ముత్తాతల ఆస్తి.. నా పిల్లల భవిష్యత్తు.. అభివృద్ధి అనే రంగు పూసి అంగట్లో పెడతారా? అరక పట్టిన చేతులకు సంకెళ్లు వేసి.. అన్నం పెట్టే రైతును అనాథను చేసి.. ఎవరి కోసం ఈ అభివృద్ధి? ఎవరి లాభం కోసం ఈ వినాశనం? నేల తల్లిని కోల్పోయిన రైతు కన్నీరు.. రేపు మీ నాగరికత పునాదులను కదిలించక మానదు! మురళి